Pizza Maru．人氣韓國薄餅

Pizza Maru餐廳裝潢簡約，韓式快餐風格，枱與枱間空間不多，一路聽住kpop。平日晚上，客人都非常多，基本上我地離開時都仲等緊位，客人以年輕人為主 。



Pizza Maru餐牌供應多款薄餅，有牛肉、蒜香雞、泡菜、薯角等接近十款，分為9寸、12寸，更具彈性，即使人少少都唔怕食唔哂，定價$117/168。鐘意食芝士嘅不能錯過，Pizza Maru有三款手工批邊可升級，包括金芝邊、摩卡邊、雙芝邊。另外仲有芝加哥薄餅、黑米長批、炸雞、意粉、炒飯、拌飯、沙律、小食、炒年糕、湯等，價錢唔算話好貴。

韓式海陸9" $133(+$24雙芝邊)

呢個Pizza Maru韓式海陸裡面有鮮蝦、牛肉、薯角、蘑菇、青椒、洋蔥，配料都幾多，而且我地仲加左雙芝邊，類似芝心批嘅意思。 薄餅以香辣醬、酸忌廉醬、馬蘇里拉芝士調味，非常惹味。呢度嘅薄餅有少少似麵包，餅底較軟腍，麵粉感唔重。


每件薄餅都有一隻蝦、牛肉，蝦仁彈牙；牛肉類似韓式做法，煎過，唔會太肥膩，但又有少少油份，所以成份薄餅食落都唔會乾，加上其他大量配料，口感豐富。 如果鐘意脆底嘅人未必會鐘意，但我地兩個都幾鐘意，而且完全唔覺得飽滯。加錢配嘅雙芝邊令口感提升，芝味都幾濃。

韓國烤肉芝加哥 $176

薄餅上枱時已經切好哂，材料用處馬蘇拉芝士、芝士條、牛小排、臘肉腸、蕃茄、巴馬臣芝士、糖霜等製成，非常豐富。Pizza Maru薄餅嘅芝士香濃，拉絲效果出眾。自己都曾經喺尖沙咀食過類似嘅薄餅，相對之下，呢份嘅芝味更突出。 薄餅外層好香脆，而可能加左啲糖霜嘅關係，食落帶點甜，粉感唔重，不膩口。


每件薄餅有一塊烤牛小排同幾片臘肉腸，烤牛肉都幾香口，切成條狀，如果每份再多少少性價比會高啲。 整體呢份薄餅係非常好食，香口惹味。

蜂蜜牛油秘製炸雞 $98/6件($183/12件)、原味炸雞 $98/6件

Pizza Maru炸雞份量彈性，怕食唔哂可以選半份，個人欣賞呢種做法，因為太多韓國餐廳嘅炸雞只有全隻，一食就十幾件，唔太適合人少食用。半份六件啱啱好，雞脾、雞胸、雞翼都有。炸雞款式多，有蒜香甜辣、原味、火辣、蜂蜜牛油、洋蔥、芝士、蜂蜜蒜泥、紫蘇等。


比起醬炸雞，我比較鐘意呢種乾身嘅炸雞，雖然睇個樣有啲似快餐店雞，外皮炸到脆卜卜，完全唔會油膩，新鮮熱辣。雞脾肉嫩滑，保留雞嘅油份，食落唔乾唔鞋。雞胸肉相對較大件，同埋口感冇咁滑。蜂蜜牛油味幾香口，主要係調味粉，唔會有好飽滯嘅感覺。

至於原味相對之下，當然較為失色。

火焰海鮮湯意粉 $96

揀呢個因為我地都比較鐘意啲香辣野，剛好見到有辣湯意粉，即管一試。湯底唔算好辣，容易入口，質地帶稠身，會比較容易掛汁。意粉腍身，加上有啲蕃茄，酸酸辣辣，幾惹味海鮮就唔多，有四隻青口、少量魷魚圈。
青口不錯，雖然細細隻，但質地軟腍，唔會有雪藏青口硬到不行嘅感覺。魷魚圈則略嫌太幼身，煮得有點耐，比較乾韌。

辣味魷魚烤蛋拌飯 $98

旁邊圍住有烤蛋，唔係好厚身，加左燈籠椒同辣醬去炒，食落香香辣辣，裡面仲有魷魚、椰菜、紫菜，份量唔算好多，不過簡單美味。

Maru紫蘇炸魷魚圈 $73

魷魚圈係當中比較失望的，約有十件，中間一坨沙律菜。食落感覺唔係即時炸起，炸漿厚身，口感偏硬實，而非香脆。魷魚都係比較硬實，冇乜彈牙感覺。

荔枝薄荷梳打 $48

Pizza Maru嘅薄餅相當出色，我地就食厭左連鎖餐廳嘅薄餅，事隔一段時間，先重拾對薄餅嘅興趣。而且款式夠多，唔怕冇選擇啊。

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com