后宮．澳門任飲任食燒烤火鍋店

今次MrMrsFoodHK就在試了后宮的皇后套餐：

上一次黎澳門玩嘅時候，喺網上搵左唔少餐廳、食店想要一試。奈何只有兩日一夜，當時晚餐揀左贏到粥，於是就冇空間再食后宮！


今次再過黎，決定點都試下，並且預早幾日時間打電話預約。週五晚上客人真係蠻多，唔預約嘅話，相信比較難安排到位置。店內裝潢貫徹中國風，用上燈籠、屏風、木椅、木枱等。

后宮任飲任食套餐

餐牌配合宮廷風，分三款套餐 ($148/$188/$248)，一律任飲任食，限兩小時，客人只需要選擇食宮女、貴妃，抑或食皇后，當然價錢不同，食物亦有所不同。


以下會為你稍作介紹，套餐名字，宮女 ($148)、貴妃 ($188)、皇后 ($248) 基本上已經反映級別。
餐牌食物一樣，分別係有冇格仔，三個格仔係任點，一個格仔係限點一次，按人頭數出，所以你唔需要填寫份量。

宮女式任食 $148+10%服務費

基本上比起另外兩個套餐，缺少左霜降牛、牛肋骨、黑豚肉、羊扒、海鮮、烤年糕，其餘食物係相同。
所以如果你係對以上食物冇興趣的話，點呢個套餐好划算，因為選擇其實唔少。
（三個格仔係任點，一個格仔係限點一次，按人頭數出）

貴妃式任食 $188+10%服務費

「貴妃」比起「宮女」相差$40，分別在於霜降牛、牛肋骨、黑豚肉、羊扒、海鮮、烤年糕，可以點一次，按人頭數出。
我認為點呢個餐最划算，一開頭當然會覺得海鮮只可以點一次唔夠，但食食下會覺得足夠有餘，畢竟餐牌仲有好多種食物可以點。

皇后式任食 $248+10%服務費

最貴係「皇后」，餐牌見到嘅都可以點，包括肉類、海鮮、鍋物。
（三個格仔係任點，一個格仔係限點一次，按人頭數出）


一般食放題都會高估自己嘅能耐，簡稱眼闊肚窄，我地一睇餐牌，就理所當然揀后宮最貴嘅「皇后」套餐。我地自問唔係細食人士，但只係點左兩輪，已經食唔落喇… 所以我估計大部分人點貴妃餐，已經好充分，除非你旨在食海鮮。
近樓梯位置有多款調料選擇，醬油、烤肉醬、椒鹽、辣椒、姜蓉，應有盡有。


燒烤、火鍋同一時間進行，所以除左揀餐，仲需要揀湯底，湯底另外收費，有麻辣雞鍋、蕃茄鍋、蒜香蛤蜊鍋等，$10-$20，價錢合理。我地揀嘅係蒜蓉蛤蜊鍋。
后宮的燒烤爐位置附上焗爐紙，幾衛生，一來客人可以避免食物容易燒焦，二來冇咁油膩，不過最重要係無需更換爐底，換焗爐紙就可以喇（店員會主動幫忙換）。
后宮第一輪上菜速度快，第二輪稍緩，唔想等嘅話，可以食到差唔多就落單。肉類方面，個人非常推介霜降牛、牛肋骨、黑豚肉、雞軟骨。海鮮方面，虎蝦、鮑魚、牛油扇貝都係必食！店內燈光偏黃，採光有難度，所以照片質素一般，但都睇得出非常豐富。


肉類：醬燒霜降牛、醬燒牛肋骨、蔥香牛舌、醬燒黑豚肉
牛肉腍身，肥脂分佈平均，輕輕燒過經食得！


海鮮：去殼貴妃虎蝦、花開寶貴鮑、愛爾蘭蟶子王
推介虎蝦鮑魚！兩樣都已經去殼、離殼，方便食用，呢點我好喜歡，唔怕整污糟手！
而且非常新鮮，肉質彈牙，以燒汁調味，完全唔腥！
相對的蟶子有點遜色，燒調味不足，燒完有少許乾。


特選蒜香雞軟骨、醬燒左腿肉、牛油扇貝、麻辣奶油蝦
麻辣奶油蝦夠惹味，店員提議拎出黎燒會快熟過放喺盤中燒，但我地更喜歡連盤燒，因為蝦肉更入味！
雪花醬燒松板豬較肥膩，燒起上來油份較多。


醬燒香菇、牛油金針菇、煉奶花生烤烤年糕、encore嘅麻辣奶油蝦
烤年糕好好食啊，年糕表面燒到微脆，裡面保持柔軟煙韌！可惜我太飽，冇能力追加！
鍋物選擇好多，但我地掛住燒烤，所以唔係食左好多。
由於我係蜆怪，瘋狂食蛤蜊，唔知食左幾多斤！蛤蜊鮮甜，完全冇沙，配蒜蓉鍋一流，自製卜卜蜆鍋！


飲品自取，樽裝可樂、雪碧、檸檬茶、菊花茶、百事、涼茶等。


后宮食物選擇多，質素整體好有水準，定價適中，可以一次過食到燒烤、火鍋，好適合我呢類花心吃貨，性價比算高！一大班朋友去的話，可以試到嘅款式更多！店員服務好好，幾位都好細心留意客人需要，主動換焗爐紙、收拾碗碟，見我有蛤蜊殼亦都醒目遞上小碟。

大吃兩小時後，我地都捧住個肚離開！

立即 FOLLOW @GetReadyHongKong，緊貼全港郊遊玩樂、品味生活、人氣美食資訊！
Facebook @GetReadyHongKong
Instagram @GetReadyHongKong
廣告查詢：Advertising @ GetReadyHK.com
傳媒聯絡：Press @ GetReadyHK.com